Ururka Al-qaacida ayaa shaaca ka qaaday inuu qabsan doono marin biyoodka isku xira gacanka Cadmeed iyo Badda Cas isagoo taageero ka helaya Islaamiyiinta ka dagaalama gudaha dalka Somalia.

Saciid Al- Shahri oo ah wadaadka 2-aad ee ururka Al-qaacida ee Jaziirada Carabta ayaa fariin maqal ah oo uu so diray waxa uu ku sheegay in ururka Al-qaacida uu rajo wanaagsan ka qabo inuu qabsado Baabul Mandab oo ah marin Biyooadka isku xira Gacanka Cadmeed iyo Badda Cas.

Saciid Al-Shahri ayaa sheegay in haddii ururkoodu uu qabsado Baabul Mandab ay arrintaas caqabad xooggan ku noqon doonto Yahuudda oo uu sheegay in Dowladda Mareykanka Taageerada ay siiso ay u soo mariso Marin Biyoodka u dhexeeya Gacanka Cadmeed iyo Badda Cas.

"Waxaan soo dhaweynaynaa hadalkii kasoo yeeray saraakiisha Xarakada Al-shabaab ee ahaa in ciidamo dagaalama ay u dirayaan dalka Yemen, taasi waxay ka turjumaysaa midnimada Umadda iyo walaaltinimada Islaamka" ayuu yiri Saciid Al-Shahri.

Wuxuu u booriyey islaamiyiinta ka dagaalama gudaha dalka Somalia inay gacan weyn ka geystaan sidii ururka Al-qaacida uu ula wareegi lahaa marin Biyoodka u dhexeeya Badda Cas iyo Gacanka cadmeed taas oo uu sheegay inay noqon doonto guul u soo hoyata umadda Islaamka.

Hadalka wadaadkaan ayaa ku soo beegmaya xilli dhawaan saraakiil katirsan ururka Al-shabaab Al-mujaahidiin ay sheegeen inay ciidamo u diri doonaan dalka Yemen si ay uga barbar dagaalamaan xoogagga dagaalka kula jira ciidamada dalka Yemen.

Axmed Yare
Xafiiska Wararka Mahiigaan
Muqdisho Somalia.